غربه

37 سنه

اليوم 13 أكتوبر أول أيام عيد الفطر المبارك

وكمان كملت 37 سنه بالتمام والكمال ويمر أمامى شريط العمر كأنه طيف

أحداث كثيره متراكمه...أفراح وأحزان...نجاحات وإخفاقات...قوه وضعف...

والواحد قاعد يفتكر إزاى وصل للسن ده والمرحله دى وبعدين قلت أعمل تاج- إستجواب- لنفسى كأن أحد بيحاورنى وكمان أفتح الباب لأصدقائى لو حد عاوز يستفسر منى عن نفسى أجاوبه لو قدرت

تيجوا نشوف الرحله دى هتوصلنا فين؟

بادرنى واحد صغير بسؤال لطيف وهو انت إتولدت يوم إيه وفين؟؟
أنا يا سيدى من مواليد يوم الثلاثاء 13 أكتوبر سنة 1970 وإتولدت فى الزقازيق-قسم النحال وفى نفس البيت اللى عشت فيه طول عمرى حتى سنة 1997 وهو تاريخ جوازى وعمرى ما سافرت وسبت البيت لفتره طويله غير عمره لمدة 15 يوم سنة 1996يعنى ماتغربتش ولا دخلت مدينه جامعيه ولا جيش
ليه هو الجيش معجبكش يا عمو؟
لأ يا ظريف مدخلتش عشان ماعنديش إخوات صبيان يعنى وحيد لى أخت واحده أكبر منى بسنتين

والتقط الأسئله واحد تانى صغير بس لميض قال لى إنت عمال تنصح فينا وتزعق لأولادك

.ماتحكى لنا كده عن شقاوتك وانت صغير؟؟؟
ضحكت وقلتله بس ماتقولش شقاوه من باب (شقى أم سعيد) قول مشاغباتك أو حركاتك المهم
أنا كنت فعلا كثير الحركه وبالعب كتير بس شاطر فى الدراسه بحكم إن والدتى ربنا يكرمها مدرسه وكانت مهتمه جدا بتعليمنا والحمد لله كنت دوما أطلع الأول بتوفيق الله ثم بحسن متابعة والدتى والمدرسين

بس إحنا يا عمو مبنحبش المذاكره وبنزهق؟؟
ولا أنا كمان كنت باحب المذاكره بس كنت باتابع كويس جدا فى الفصل والمدرس بيشرح وأعمل الواجب فى المدرسه كمان وأركز فى الإمتحانات وطول مرحلة إبتدائى كنت جالس فى الصف إلى أكبر منى بسنه علشان أخد 5 و6 فى سنه واحده ولكن للأسف منفعش لأنى طلعت صغير 12 يوم ودى كانت صدمه ربنا أعانى وعديتها

ومين أكتر ناس حبيتهم فى طفولتك؟؟
طبعا غير أسرتى كنت بحب مدرستى الأبله مبروكه بتاعة العلوم ربنا يعطيها الصحه والعافيه والأستاذ فاروق الفخرانى ربنا يغفرله ويرحمه وزميل دراسه كان إسمه جمال عبد الناصر...وآخرين لا أذكرهم الآن

وإيه الحاجات اللى كنت بتحبها وتحب تلعبها الكمبيوتر أكثر ولا البلاى ستيشن ولا كنت بتحب تشوف سبيس تون؟
ضحكت بصوت عالى وقلت له لا اللعب بالموبايل...يا إبنى أيامنا كان فيه النحله والكره الشراب اللى إتطورت للبلاستيك والبلى والحجله فبرق لى وسكت ...وبكده قدرت أخرج من مطب الأطفال اللى مش هيخلصوا أسئله للصبح

والظاهر إن الحوار عجب القعده كلها فلاقيت واحد كبير شويه بس عقر بيقولى طيب إيه إلى أثر فيك فى صغرك واستمر معاك للآن أو حول مسار حياتك؟؟
فى حاجات كتيره بس أبرزها

1- الأسره المتدينه فجدى كان من الإخوان عليه رحمة الله وكان إسمه كامل عبد الرازق وابتلى بالسجن 17 سنه من سنة 54- لسنة 71 وأنا كنت باحبه جدا رغم إنى لم أعايشه إلا 5 سنوات مثلا كنت مدرك فيهم لأنه مات سنة 1980 ربنا يرحمه وأعتقد إن حبى الدفين له وإشفاقى عليه من اللى إتعرض له من تعذيب غرس فيا روح تحدى ضخمه لمواجهة هذا الظلم وإستعداد لسلوك نفس الطريق...ربنا يرحمك يا جدى فين لما كنت تاخدنى معاك المسجد ولما ترجع من صلاة الفجر ومعاك الأهرام وقرطاس الطعميه ونقعد نفطر سوا وربنا يسامحك برضه إنت اللى خلتنى فى فتره أحب الزمالك والكره وتعبت لغاية ما تخلصت من إدمانها فى بداية الجامعه ولسه باعانى من بقاياها للآن

2- أما والدى ربنا يبارك فيه فلا يكفيه كتب للحديث عنه وأنا ناوى أفرد له باب مستقل لحبى وذكرياتى معه بس العنوان الأبرز له فى حياتى إنه راجل من عصر غير عصرنا-فعلا ولا أزكيه على الله لم أقابل فى حياتى بنى آدم فى بساطته وعاطفته وشفافيته وده مش تحيز والله فلما جدى يجوز والدى لأمى يطلع الغرس كويس والحمد لله وده مش مدح فى الذات ولكن رجاء ان تكون كده ويظل الأثر الطيب فى ذريتنا

3-الإعتماد على النفس
والدتى ربتنا أن نعتمد على أنفسنا فى كل حاجه نظام الغرفه ونظافة البيت وشراء الطلبات وحتى الدفاع عن النفس وكانت أبرز محطه فاصله هو قرار صعب أخدته وأنا عندى 12 سنه بألا أسافر السعوديه مع أبى وأمى فى إعاره وأبقى فى مصر مع أختى وجدتى رحمها الله لترعانا وبالتالى رغم وجود الفرصه وخطورة المرحله السنيه ووجود عوامل إفساد كبيره إلا أنه وبفضل الله ربنا نجانا ومرت 4 سنوات على خير ليعود الوالدين يجدونا بخير وسلام وتفوق دراسى وشخصيات مستقله تماما مما صعب مهمتها فى التأثير على انا بالذات فى المستقبل

4- حب الرياضه
فمثلا انا لعبت واتدربت كرة قدم – سباحه – كره طائره – تنس طاوله –تنس أرضى – وكنت بأتابعهم كلهم فى الصحف والتليفزيون
وده ساعدنى كتير طول حياتى فى المحافظه على الوزن وشغل بعض الأوقات على الأقل فى غير الضار إن لم يكن المفيد وخاصه فى مرحلة الشباب

5- حب السفر
طول عمرى باحب الرحلات وكثرة التنقل من اول رحله طلعتها فى أولى إبتدائى لمتحف الزعيم الوطنى أحمد عرابى سنة 1976 ومرورا بزيارة كل محافظات مصر عدا البحر الأحمر وسيناء الجنوبيه حتى وصل بى الحال إنى عشت بعد الزواج فى 4 محافظات خلال 8 سنوات وخلال عملى فى 10 سنوات زرت دول كثيره زى السعوديه – الأردن – البحرين – لبنان – الجزائر – تونس – السودان – الإمارات – ألمانيا فرنسا - إنجلترا – إيطاليا – سويسرا – أيرلندا – تركيا – الصين – كوريا الجنوبيه – هونج كونج – بنجلاديش
وحب السفر هذا خفف عنى كثير من آلام الغربه وتعب السفر وإن كنت مقصر فى التعرف كويس على البلاد اللى بازورها وباكون مركز فى الشغل اللى أنا رايح علشانه